Sebebo diyin, bi qewetê îmanê tehqîqiyî û bi berqê ke tefekkurê îmaniyê masnûatî ra yenî û netîceyê marîfetê Saniyî danî, yew tewir huzur qezenç keno, fikirîno ke Xaliqê Rehîm hazir û nazir o, rizayê ey ra vêşêr ê sewbînan nêgeyreno, huzurê ey de sewbînan ra ewniyayene, meded geyrayene, edebê ey huzbarî rê muxalîf biyayîş o, no tewir fikiriyayene reyra riya ra xelisîno, îxlasî qezenç keno. De çi ke est o… Tiya de zaf mertebeyî est ê. Kam ke goreyê hîsseyê xo çiqas tira îstîfade kerd endehîna kar o. Rîsaleya Nurî de zaf heqîqetî vajiyayî ke insanan riya ra xelisnenî, îxlasî danî qezençkerdişî coka hewaleyê ey kenîme, tiya de kilm birnenîme.

   Sebebê ke îxlas şiknenî û merdimî ver bi riya kaş kenî zaf î. Ma înan ra di-hîrênan bi kilmekiye beyan kenîme.

   O YEWIN:

   Reqabeto ke menfaetê maddî ra yeno fesal-fesal îxlasî şikneno. Hem zirar dano netîceyê xizmetî zî. Hem ê menfaetê maddiyî zî remneno.

   Heya, êyê ke seba heqîqet û axîretî xebitînî, na millete înan ra hes kerdo, qarşê înan her daîm fikrê hurmet û muawenetî/ ardimkerdişî xo miyan de pawito. Û bîlfîîl seba ke bibî şîrîkê îxlasê înan ê heqîqî û xizmetê înan ê sadiqî, seba ke wextê înan zayî nêbo hewcedariya înan ê maddî reyra meşxul biyî, sey sedeqa û xelatê maddî, înan rê hetkarî û hurmet kerdo. Labelê, no ardim û menfaet nêwazêno belkî yeno dayîş. Hem ganî zerrî ra nêwazo/ qayîl nîbo û nêpawo, hem ganî ziwanê hal reyra zî nêwazêyo. Belkî to hîn dî ke ameyo dayîş. Nêke îxlasê ey herîmîno. Hem nizdiyê nehyê na ayete beno

وَلَا تَشْتَرُوا بِاٰيَاتٖى ثَمَنًا قَلٖيلًا

qismêk amelê ey veşenî.