Ji ber vê jî bi ehlê derdora Necdê re xeydek li hember Xelîfeyên Raşidîn û Ehlê Sunnet û Cemaetê çêbû. Digel ku Mislimanên xalis in jî, lê dîsa derba ku pêşiyên wan xwarî ji bîr nakin. Ji ber ku bi derba adilane ya Hz. Umer (r.e.) dewleta Îranê têk çû û xurûra wan şikest, Şîeyan çi dema ku firset dîtine, di bin perdeya hezkirina Ehlê Beytê de, bi hesta tolhildanê êrîşî Hz. Umer (r.e.), Hz. Ebûbekir (r.e.) û Ehlê Sunnet û Cemaetê kirine.
Ya Sisêyan: Zatên mîna Îbni Teymiye û Îbni Qeyyimê Cewzî ku ji mezinên Wehhabiyan in û dahiyên ecêb in, zêde êrîşî weliyên mezin yên mîna Muhyeddînê Erebî(q.s.) kirine. Guya xwestine ku li dijî Şîeyan efdelbûna Ebûbekir biparêzin û bibêjin ku di ser Hz. Elî re ye. Lê ew qîmetê Hz. Elî pir dadixin jêr û fezîletên wî yên ji adetê der, normal dibînin. Gelek weliyên mîna Muheyddînê Erebî (q.s.) înkar û tekfîr dikin. Hem jî ji ber ku Wehhabî xwe ji mezhebê Ehmed b. Henbel dihesibînin û ji ber ku Ehmed b. Henbel jî hafiz û rawiyê milyonek hedîs e, serekê mezhebê Henbelî yê bêtawîz e, di mesela Afirandina Qur’anê de jî berxwedaneke bêmînak nîşan daye û ji cîhanê re meydan xwediye; Wehhabî ji vî mezhebê wî yê ku zahiren hinekî muteesibane ye û muxalifê Elewiyan e; îstîfade dikin, tirbên hinek weliyan xira dikin û xwe mafdar dihesibînin. Lê ya rast eger dirhemekî mafê wan hebe, ew deh dirheman jî pê ve dikin.
Nukteya Duduyan: Çawa ku ji hêla adetên Îslamî ve sê bingehên vê mesela Wehhabiyan hene, eynî wisa ji hêla alema mirovahiyê ve jî sê bingehên wê hene:
Bingeha Pêşîn: Eger mirov bi çavê ehlê dinyayê û tarîxa maddî li jiyana civakî ya mirovan binêre, xweya dibe ku jiyana civakî û siyasî ya mirovan di çend pêvajoyan de derbas bûye: Serdema pêşîn; berîbûn û koçerî ye, ya duduyan serdema memlûkiyetê ye, ya sisêyan serdema êsîriyê ye, ya çaran serdema karkeran e, ya pêncan jî serdema xwedîbûn serbestiyê ye.
Serdema berîbûnê bi dînan û hukûmetan hatiye guherandin, êdî serdema nîv-medenîbûnê dest pêkiriye. Lê mirovên zekî û bi hêz, hinek însan kirine kole û malê xwe, ew daxistine dereceya heywanan.
